Rev 5 | MMX | STEP | Melemu nia aga ven lugun linga ro at lekngen tino ap mo lara gat kis to at loxonin orong. Mo lugun linga ga umsu mi levenmamalagan to melamgo la to bok melemu ren, digam lut avarang i mi lavanuti levelumlut.

b1 Let 29:11

c1 Let 29:11

Revelation of John 5

Lanasip Ga Lok Ka Lugun Linga Boro At Ne Moroa

1 Melemu nia aga ven lugun linga ro at lekngen tino ap mo lara gat kis to at loxonin orong. Mo lugun linga ga umsu mi levenmamalagan to melamgo la to bok melemu ren, digam lut avarang i mi lavanuti levelumlut. 2 La nia aga ven laangelo lolos gap kup lolos mi lususue xeretna, ‘Nege i epovo do na ba kaxat na levelumlut la na obes na lugun linga?’ 3 Ketla kopmen teta ro vana at laxalibet kopla ro xopok at lavatbung menemen kopla de maxopok at lavatkangka gita epovo xusu na obes mo lugun linga la gita us mo levelinga ga nemen keneng teren. 4 La nia agang teng aleng mila kopmen teta gita epovo xusu gita obes i nom lugun linga la ri us mo levelinga. 5 Melemu lara atdi luvuttadi amgomgo ga lok tia, ‘Nemen utang teng. Mo laion, ni at libibinat at ne Juda, la livisik li at ne Devit, neni ira but asi vam lavamunepen min, la neni mun i epovo ri sak korop mo lavanuti levelumlut la na obes mo lugun linga.’

6 La aga ven lara Lanasip ga tu kantubu rinotno at nom loxonin orong, la mo lavanuet levempanga rooro eburu mi loxongkulao amgomgo diga tu kangkan i; Lanasip ga tu, ga ven ngan ta do limixin diga sev amet pam i. Neni ga ruuna lavanuti levengkom la lavanuti levengkatli, nedi leventoonan at ne Moroa, mo ga riki asi di ri lengkot axap at na lavatbung menemen. 7 La mo Lanasip gat pas la ga lok ka mo lugun linga boro at lekngen tino at ne Moroa, mo gat kis at loxonin orong. 8 Neni ga lok ka mo lugun linga, la nom lavanuet levempanga rooro eburu mi nom legepu sangaun mi lavanuet loxongkulao amgomgo diga xis tiktikbu mi lempatgulom atdi ro melamgo at Lanasip. Nedi getgesara digam tebeng lengkon taaleng eburu mi leventingtigon gol mo ga umsu mi levempavaxan una so mavak. Ni ga ru katling levesingising atnedi limixin at ne Moroa. 9 La nom lavanuet levempanga rooro eburu minedi loxongkulao amgomgo diga vixan lara loxompixan maxat, i lok keretna,

‘Nenu u epovo rinotno xusu una lok ka lugun linga la una ba kaxat kepe mo levelumlut teren mila limixin diga sev amer u; ketla uga roo xat amlong la at nom mun lada ram uga un ka amlong limixin ti ne Moroa. Nedi at levenabung mixin axap la boro bok at levempapaase vetpes, la boro bok at lenbantuxu vetpes, la boro bok at larabibinat petpes. 10 La uga lok katling di ngan lavamaasa at Linintoo ram kusu diba lok lugugu at ne Moroa, la dinabam gomgo ri limixin axap at na lavatbung menemen ngan limixin amgomgo atdi.’ ^a

11 Melemu aga milik la aga ronga buaang nedi laxanangelo, diga umsu aleng la a goxo epovo xusu ana us di. Diga tu kangkan mo loxonin orong eburu mi lavanuet levempanga rooro la loxongkulao amgomgo. 12 La diga vaase silok keretna,

‘Lanasip, no limixin diga sev amer i; neni i epovo rinotno xusu na ruuna ka lololos, lapnovos, lakleklen, loklok ngangao, leemi asu la leveloklox anarong.’ ^b

13 Melemu aga ronga leemi asu boro at lempanga axap ne Moroa ga rudum li di, nedi limixin eburu mi levempanga mi lavanuet kangkedek atdi, la nedi bok pana at laxalibet la nade xopok at lavatbung menemen la lempanga bok dik lok keneng at lebelen laxangka la lempanga dik lok at lebelen laras; diga lok,

‘Ti mo lara it kis at loxonin orong la ti Lanasip bok, ma raba numu mi leveloklox anarong, loklok ngangao, leemi asu la lololos ba nemen amisik la kopmen taxavaxap teren.’ ^c

14 La mo lavanuet levempanga rooro diga lok, ‘I ruturun.’ La mo loxongkulao amgomgo diga xis tiktikbu mi lempatgulom atdi la diga lotu parap ne Moroa eburu mi Lanasip.